السفينه

السلام عليكم ورحمة الله وبركاته


ضاقت وساع الفيافي والوعد مثل السفينه
للطريق الي دعاني بعد أمان الله وأمانه

لا تناديني وصوني قلبج الله لا يهينه
لا يراهن في رجوعي لجل ما يخسر رهانه

ليه ما ارحل عن غرامج بعد ما ذقت الغبينه
اذكريلي شيء واحد يستحق أقعد عشانه

قلب ما حن لوصالي ماني بحاجه حنينه
وأشهد إنه ما يعزر بالرفيه إلا هوانه

الهوا الغدار حد الله ما بيني وبينه
والرجل لا خير فيه إن ما حفظ قدره وصانه

واحد مثلي إليا من حدته عوجا سنينه
ما شكى لأقرب بن آدم لو هو أغلى من أخوانه

يوم قلبي ما عصاج وما قدرتي تذبحينه
ليه خنتي فيه وانتي معه من نفس الديانه

كان ذبحي بيدج أرحم لي من الي تفعلينه
وإن طلبتج تذبحيني ما ذبحتيني لعانه

كل جرح من جروحي تذكرينه تنكرينه
كن مالج في نزيفه يد خانت بالأمانه

ينزف الخافق تواضع لين لطختي جبينه
ولا إنا ماكنت أبيها توصل لحد الإهانه

قلت من باب الميانه صاحبج وتعذبينه
لعن أبوج إرخي معاي شوي ما صارت ميانه

ضعت عقلج يوم قيل إن العقل بالبنت زينه
لكن الشرهه علي الكنت أحس إنج دكانه

من بعد ما كنتي أنتي في حشاي أغلى سجينه
بوعدج بطلق سراحج واتهمني بالإدانه

وين رايح لأي درب ما يرجع للمدينه
ليه رايح لأن قلبج ما ترك قلبي وشانه

كيف أبنسى ربي الي ملهم القلب السكينه
مثل ما عانه ابقربج لا نوا فرقاج عانه

كان قاسي يجرح الطراف السكاكين السنينه
ما يطيح وبنت مثلج حبها هزت كيانه

ولا أنا خابر خفوقي ما يمد إلا الثمينه
وإن بغى يغيظ الثريا قعد القمرا وزانه

مزعل لجلج هنوف رجت اعقول رزينه
وإنت تهادت بالطريق الجرهدي تزهر جنانه

جاذل كن الجمال اقبالها كتف إدينه
والقمر لو شاورتله ينزح وتقعد مكانه

كانت أول من تحكم في فروع الياسمينه
وإن تعددتهن تثنن خيزرانه خيزرانه

بعتها لجلج وصارت لأصغر أطرافج رهينه
ولا هي لفتة هدبها تغمرج ثقل ورزانه

والخفوق الي تغذى من معزة والدينه
مشكلته إنه تعلق في زمان ماهو زمانه

كل ما زادت جراحه واكتشف غلطة ظنينه
صدقيه إن قال مابه شخص يستاهل حنانه

يوم نادى يا فلانه ما رضيتي تسمعينه
لين صوت يا فلانه يا فلانه يا فلانه

كنت أشوفج زعفرانه تقلب الورد وتدينه
يمكن إني ما قلبتج بس أشوفج زعفرانه

كنت أهاب البعد عنج وأطلبج لا تذكرينه
كان خوف من الفراق وخطوة الفرقا جبانه

ماقتنعت إن الخيانة للرجل تلوي يمينه
لين ما ربي بعثج وذقت من طعم الخيانه

اسمحيلي ما بقى فيني مكان تطعنينه
واقبلي من جوف قلبي كل عطفه وامتنانه

والله الله في عذابج بتركج عينج ابعينه
دلليه وما يرده عن شقاج إلا لسانه

ولا أنا قررت أسافر وامطتي ظهر السفينه
لن مابه شي واحد يستحق أقعد عشانه

دمتم