القدر ........

--------------------------------------------------------------------------------

الله اللي جابها بمحكم كتابه
ليت ماتنفع ولا لكن ..ومير


القدر ماينقدر كلٍ ٍ يهابه
احتذارك مايفيدك يا حذير


ما يمِيز لا لفا ونوخ ركابه
لا حضر مايعرف كبير و صغير


وعلم غيب الكون ربي اللي درابه
منهو غيره عالمٍ فينا بصير


ضاق صدري من بعد ذيك الرحابه
ضيقت المديون ومخاوي فقير


غاب فجأه .. واختفى ياللغرابه
مابعث لي لارساله .. لانذير


ياكثير الأسئله وين الأجابه؟
وش حصل له علميني بالمصير


صارت الأيام بعيوني تشابه
قمت أشوف بعينها حزنٍ ٍ كبير


للألم .. والهم .. وأيام الكآبه
للقسى .. للجرح .. لشياءٍ ٍ كثير


ايه يا وقتٍ ٍ خذلني باحتسابه
ارتميت بسكته وين المشير؟


جيت ألم جروح وقتي بالكتابه
ضاع حرفي وانعكس خط المسير


قمت أشوف الوقت غاشيني سرابه
ينثني بالهم .. يا همٍ ٍ مرير


هم (( يوسف )) خوّنوا فيه القرابه
من غباهم أحذفوه بوسط بير


حطّوا التهمه.. على ذيب الذيابه
لين ابوهم صار من حزنه ضرير


وألاّ طفلٍ ٍ حده الوقت وغدابه
ماتت امه بالمهد توّه غرير


ذاق كاس من اليتم زوَّد عذابه
وزود هذا وذيك ماله من نصير


وألاّ .. رجل من العطش يرجي شرابه
من عدودٍ ٍ ممحله مل الهجير


وألاّ .. طيرٍ ٍ منكسر والوقت صابه
لا بغى المطيار ما يقدر يطير


وألاّ .. سبعٍ ٍ منشلع من فمه نابه
في طعامه صار للضبعه خشير


الحقايق بيَّنت لي عند بابه
يوم شفته عاجزٍ ٍ حتى يسير


في عيوني شفت انا قوة مصابه
شفت عودٍ ٍمرتمي فوق السرير


يعني صارت دنيتي أشباه غابه
إنكسرت بكسرت العود الكسير


لو يفيد المال جمَّعنا حسابه
(( الوليد )) الشامخ الشهم الامير


ولو تفيده دمعتي بنخي سحابه
من دموعٍ ٍ تستغيث و تستجير


ولو تفيده فزعتي قومت لابه
عزوتي في لابتي ربعي مطير


ماتفيده غير دعوه مستجابه
من مشاعر صادقه لربٍ ٍ خبير


ياإلـهي سلّمه لهله وشبابه
ولا نشوفه غير في صحه و خير


ما يلام القلب لا منه حكابه
لن طبعه غير .. كل الناس غير


وسلامتكم